ჩვენი სხეულის მთავარი საყრდენი ხერხემალია, ამიტომ მისი სიჯანსაღე გადამწყვეტია ჩვენი ზოგადი კეთილდღეობისთვის. იოგა განიხილება, როგორც ეფექტური საშუალება ხერხემლის პრობლემების მართვისა და მათთან გასამკლავებლად. იოგის გარკვეული ასანები აძლიერებს ზურგის კუნთებს და აუმჯობესებს ტანდეგობას, რაც ამცირებს არასწორ დატვირთვას ხერხემლის მალებზე და გვეხმარება ყოველდღიურ ცხოვრებაში ხერხემლის ნეიტრალური და უსაფრთხო პოზიციის შენარჩუნებაში.
იოგა ხერხემლის ჯანმრთელობისთვის აუცილებელია, მისი ზოგიერთი ასანა ხელს უწყობს კუნთებისა და მყესების მოდუნებას და მათში სტრესის შემცირებას, რაც ხშირად კუნთების დაჭიმულობისა და ტკივილის მიზეზია. იოგის პოზები, რომლებსაც მოსწავლე რეგულარულად ასრულებს, ხელს უწყობს დაჭიმულობის მოხსნას, ზრდის ელასტიურობას და აუმჯობესებს ხერხემლის მოძრაობის დიაპაზონს. იოგის ასანები ზედმეტად არ ტვირთავს ხერხემალს, არამედ აძლიერებს მას. იოგა შვებას გვრის და აუმჯობესებს მდგომარეობას მათთვის, ვისაც სხვადასხვა ხერხემლის პრობლემა აქვს: ხერხემლის თიაქარი, ლორდოზი, კიფოზი და სხვ. სწორი და ყოველდღიური ვარჯიში ამსუბუქებს ტკივილს და ხშირად სრულად აქრობს მას.
ჯანსაღი ხერხემლისთვის მნიშვნელოვანია ისეთი ვარჯიშები, რომლებიც ამაგრებენ კუნთოვან კორსეტს, განსაკუთრებით ზურგის, მუცლისა და მენჯის კუნთებს. ძლიერი კორსეტი ხერხემალს სწორ პოზიციაში იჭერს და ამცირებს დატვირთვას. ზურგის კუნთების გასაძლიერებლად ყველაზე ეფექტურია მუცელზე დაწოლილ მდგომარეობაში შესრულებული პოზები. მთელი სხეულის გაძლიერებასა და ხერხემლის გაჯანსაღებას ხელს უწყობს ფეხზე მდგომი პოზები. მნიშვნელოვანია გრეხვითი პოზები, რომლებიც მეტ მოქნილობას სძენს ხერხემალს.
ხერხემლის ნებისმიერი ტიპის პრობლემის შემთხვევაში ვარჯიში აუცილებელია. იოგის ასანები ინსტრუქტორის მიერ ინდივიდუალურად უნდა იყოს მორგებული თითოეული ადამიანის მდგომარეობაზე და სათანადო სიფრთხილით შესრულდეს.
