შეცდომები, რომელსაც ახალბედა ვეგეტარიანელები უშვებენ
მრავალმა ადამიანმა სხვადასხვა მიზეზის გამო გადაწყვიტა შეეწყვიტა ხორცის ჭამა და გამხდარიყვნენ ვეგეტარიანელები, მაგრამ ამა თუ იმ მიზეზის გამო მალევე შეწყვიტეს ვეგეტარიანული კვება და დაუბრუნდნენ მანამდე უკვე ნაცნობ საკვებს.
რა განაპირობებს ამას? სად ქრება ენთუზიაზმი? ძალიან ხშირად ეს უბრალოდ არცოდნაა და ამ არ ცოდნიდან გამოწვეული დისკომფორტი ან ჯანმრთელობის პრობლემები. რა თქმა უნდა, ვინ რას და როგორ ჭამს ჩემი საქმე არ არის, ეს ინდივიდის არჩევანია.
ეს პოსტი იმისთვის არის შექმნილი, რომ განვიხილოთ ახალბედა ვეგეტარიანელების ყველაზე ხშირად დაშვებული შეცდომები, რათა ეს შეცდომები თავიდან ავიცილოთ და თქვენი არჩევანი არ გადაიქცეს დისკომფორტად, ჯანმრთელობის პრობლემებად და ხანდახან ჯანმრთელობის მძიმე დაზიანებად.
ხშირად ახალბედა ვეგეტარიანელებმა არაფერი იციან ადამიანის ბიოლოგიურ აგებულებაზე და არ ესმით რა სჭირდება ორგანიზმს. ასევე არ ესმით სხვადასხვა ფიზიოლოგიური და ფსიქოლოგიური ფაქტორები.
მე მოგიყვებით ახალბედა ვეგეტარიანელების 10 შეცდომაზე, რომლებსაც ისინი ყველაზე ხშირად უშვებენ.
გავრცელებული შეცდომებია:
1. საკუთარი თავის იძულება.
ყველაზე მეტად გასათვალისწინებელია ფსიქოლოგიური ფაქტორი და ის თუ რამდენად მყარია თქვენი გადაწყვეტილება. პირველ რიგში თქვენი ცვლილება უნდა ემსახურებოდეს მიზანს. თუ მიზანი ნათელია და ზუსტად იცით რატომ აკეთებთ ამას თქვენ მარტივად შეძლებთ ხორცზე უარის თქმას. ასევე გასათვალისწინებელია სტრესი, რომელსაც ორგანიზმი კვების შეცვლით განიცდის. ასევე ნუ აყვებით მოდას, თუ ხვდებით, რომ ვეგეტარიანელობა თქვენი არაა, ტყუილა ნუ დაატანთ თავს ძალას. ვეგეტარიანელობა თქვენი თავისუფალი არჩევანი უნდა იყოს და არა ტანჯვის გამომწვევი მიზეზი.
2. ჩქარი ცვლილება.
ხშირად ადამიანებს ჰგონიათ, რომ მეორე დღიდანვე უკვე ვეგეტარიანელები უნდა გახდნენ. ეს ესე არ ხდება. ორგანიზმისთვის ესეთი უეცარი ცვლილება ძალიან დიდი სტრესია და აუცილებლად აისახება თქვენ ფსიქიკაზე. ცვლილება ჯობია ნელ-ნელა განხორციელდეს. დაიწყეთ თქვენ ჩვეულ კვებაში უმი ბოსტნეულის შემოტანა. პირველ თვეს 20%, მეორე თვეს 30 და ესე 50% მდე. შემდეგ უკვე შეგიძლიათ ხორცის ჩანაცვლება დაიწყოთ, თან დააკვირდით სხეულს. ცადეთ სოიოს, ოსპის, მუხუდოს და ლობიოს შემოტანა, დროთა განმავლობაში შეამცირეთ ხორცი და ბოლოს შეწყვიტეთ მისი მოხმარება.
3. ხორცის ჩანაცვლება მხოლოდ ცომეულით.
ხორცის ამოღება არ ნიშნავს მხოლოდ ხაჭაპურზე, მაკარონზე და კარტოფილზე გადასვლას. ესეთი ქცევა ენერგიას წაგართმევს. ჩართე რაციონში ცოცხალი ბოსტნეული, ხილიდან და ბოსტნეულიდან გამოწურული წვენები, პარკოსნები და მარცვლეული!
4. ცილის იგნორირება.
ბევრი ივიწყებს, იმას რომ ცილა სჭირდება. ცილა ორგანიზმისთვის შეუცვლელია მას ორგანიზმი ვერ ქმნის ვერც ნახშირწყლების და ვერც ცხიმების დაშლისგან მიღებული ნივთიერებებისგან. ზოგს ჰგონია რომ ცილა მარტო ხორცშია ეს შეცდომაა სინამდვილეში ის ძალიან ბევრ რამეშია მაგალითად: სოიო, ლობიო, ოსპი, მუხუდო, შვრია, ხორბალი, ტოფუ, ხაჭო, მაწონი და თხილეული ცილის არაჩვეულებრივი წყაროებია.
5. შეუცვლელი ამინომჟავები.
ადამიანის ორგანიზმისთვის საჭირო ცილას ორგანიზმი გარედან მიღებული ცილების დაშლის ხარჯზე აწარმოებს. ცილები შედგებიან ამინომჟავებისგან. არსებობს ამინომჟავები, რომელიც სხეულმა უნდა მიიღოს ის მას ვერ შექმნის სხვა ამინომჟავის ხარჯზე. ესეთი ამინომჟავა არის 9 (ძველ სამედიცინო ლიტერატურაში 8) და მათ შეუცვლელს უწოდებენ. რადგან თქვენ წყვეტთ ხორცის მოხმარებას, რომელიც ყველა შეუცვლელ ამინომჟავას შეიცავს თქვენ ის უნდა ჩაანაცვლოთ სხვა რამით. ამინომჟავების სრული სპექტრის მისაღებად საკმარისია პროდუქტების სწორი კომბინაცია დღის განმავლობაში.
მარტივი ფორმულა: პარკოსნები + მარცვლეული = სრულფასოვანი ცილა. (მაგალითად: ოსპი + წიწიბურა, ლობიო + ბრინჯი, ან ჰუმუსი + პური). ასევე, ჩართე რაციონში ისეთი მცენარეები, რომლებიც ბუნებრივად შეიცავს ყველა ამინომჟავას: სოიო (ტოფუ), კინოა, ჩია და კანაფის თესლი.
6. B12 ვიტამინის დავიწყება.
ეს ის ვიტამინია, რომლის მიღებაც მცენარეული საკვებიდან რთულია. აუცილებლად გადაამოწმე დონე და საჭიროების შემთხვევაში მიიღე დანამატის სახით. მაწონი, იოგურტი, ყველი და სხვა რძის პროდუქტები ბ12 კარგი წყაროა.
საყურადღებო ნიუანსი: ბევრი ფიქრობს, რომ B12-ის მიღება ფერმენტირებული პროდუქტებიდანაც (მჟავეული, ტემპე, კომბუჩა) შეიძლება. არ მოტყუვდეთ! მცენარეულ ფერმენტირებულ საკვებში ხშირად გვხვდება ვიტამინის არააქტიური ფორმა (ანალოგი), რომელსაც ჩვენი სხეული ვერ ითვისებს.
7. რკინის არასაკმარისი მიღება.
რკინის დეფიციტი (ანემია) ერთ-ერთი ყველაზე გავრცელებული პრობლემაა დამწყებ ვეგეტარიანელებში. ბევრს ჰგონია, რომ თუ ისპანახს ან ოსპს შეჭამს, რკინის პრობლემა მოგვარებულია. სინამდვილეში, მცენარეულ რკინას ორგანიზმი გაცილებით რთულად შეითვისებს, ვიდრე ხორცისას. როგორ გამოვასწოროთ?
გამოიყენე (ვიტამინი C). იმისათვის, რომ მცენარეული რკინა სისხლში მოხვდეს, მას სჭირდება C ვიტამინი. ფორმულა: ლობიო + ბულგარული წიწაკა; წიწიბურა + კივი/ფორთოხალი; ისპანახი + ლიმონის წვენი.
მოერიდე „ბლოკატორებს“: ტანინები და კოფეინი რკინის შეწოვას ხელს უშლის. არ დააყოლოთ საჭმელს ჩაი ან ყავა! დაელოდეთ ჭამიდან მინიმუმ 1 საათი.
დამატებითი რჩევა: გაითვალისწინეთ, რომ კალციუმიც ხელს უშლის რკინის შეწოვას. ამიტომ, თუ რკინის დეფიციტი გაქვს, ეცადე ყველის, მაწვნის და სხვა რძის პროდუქტის მიღება და რკინით მდიდარი სადილის (მაგ. ოსპის წვნიანი, წიწიბურა) მიღება დროში გამიჯნო.
8. მცირე ულუფებით კვება.
მცენარეულ საკვებს ხშირად ნაკლები კალორია აქვს, ვიდრე ხორცს. თუ მუდმივად გშია, ეს ნიშნავს, რომ საკმარისს არ ჭამ და უნდა გაზარდე ულუფები. მოუსმინეთ საკუთარ სხეულს. საკვების დანაკლისი თქვენი სხეულისთვის ძალიან დიდი სტრესია. ეს ნეგატიურად აისახებ თქვენ ფსიქიკაზეც.
9. ერთფეროვნება.
ყოველდღე წიწიბურას ჭამა მალე მოგბეზრდება. ექსპერიმენტი ჩაატარე ახალ რეცეპტებზე ან მოიძიე უკვე არსებული რეცეპტები. ინტერნეტში უამრავი რეცეპტია, რომელსაც შეუძლია შეგიმსუბუქოს ვეგეტარიანელობის პირველი თვეები.
10. წყლის არასაკმარისი მიღება.
როცა ვეგეტარიანელი ხდებით, ხშირად იზრდება უჯრედისის (ბოჭკოს) მიღება ხილისა და ბოსტნეულის ხარჯზე. წყლის გარეშე ამან შეიძლება მუცლის შებერილობა გამოიწვიოს. სვით მეტი წყალი!
